Samin sa Kasingkasing
Sinulat ni Stella Tabelon
Texto: Colosas 3:12-17
Kung maghisgut gani ug kasingkasing kargadohan sa mga tawo malipayon kay tungod hilambigit kini sa pulong nga gugma. Kung unsay naa sa kasingkasing makita sa mga mata o hunahuna, masulti sa baba, madungog sa dunggan ug mabuhat sa lawas. Mura ug samin nga mohulagway sa hitsura sa tawo nga masulob-on o malipayon, perverso o maalamon, mapagarbohon o limpyo, malimbongon o matinud-anon. Adunay usa ka pisikal nga kasingkasing ug usa ka espirituhanon nga kasingkasing ug mao kini ang pinaka-importante nga aspeto sa kinabuhi. Ang samin sa kasingkasing, usa ka lugar diin giawhag ang matag-usa nga papuy-on ang gugma sumala sa mando sa Dios kanato nga ana makita sa Colosas 3:12-17.
Sa maong texto, ang Dios nagtudlo kanato kung unsay maayo ug unsay di maayo. Siya nagagiya kanato sa pagtukaw sa kaugalingon aron makabaton kita ug kasingkasing nga sama sa iyang kasingkasing. Sa pagtuman niini kita nagkinahanglan ug mga samin aron makita nato kung unsay sulod sa atong kasingkasing. Kining samin sa kasingkasing puede makita nato sa atong mga kaigsounan sa iglesia, higala, miembro sa familia o espirituhanon nga mentor diin makita nato nga nakaangkon sa gasa, talent o abilidad nga hatag sa Dios nga makatabang sa pagdala sa katawhan sa maayong dalan. Lain nga samin nga atong gikinahanglan isip hagiban mao ang samin sa pag-ampo. Kung kita naggahin ug panahon sa pag-ampo atong giablihan ang pultahan sa atong kasingkasing aron makasulod si Cristo. Sa dihang ibutang nato ang atong kaugalingon atubangan sa Dios uban sa mapainubsanon gawi ug pagka sincero, nan maminaw kita pag-ayo sa atong hunahuna ug mga pagbati. Dinhi nato makaplagan ang tinuod nga kaugalingon ug madiscobre nato kung unsay naa sa kasingkasing sa Dios nga gibutang niya sud sa atong kasingkasing. Busa magkalipay kita kang Cristo ug Siya magahatag kanato sa mga tinguha sa atong kasingkasing.
Binhi sa Damgo
Sinulat ni Stella Tabelon
Genesis 15:1
Sa human niining mga butanga miabut ang pulong ni Jehova kang Abram, sa usa ka panan-awon, nga nagaingon: Dili ka mahadlok, Abram, ako mao ang imong kalasag, ug ang imong daku uyamut nga tumbas.
Tagsa-tagsa ka mga tawo naay damgo pero dili tanan naay kaisug sa pagtuman sa maong tumong. Ang damgo dili instant kundili usa kini ka proceso nga mag-agi ug pagsulay, mahimong lisud, komplicado ug imposible nga abton. Ug dili nimo maangkon ang kadaugan kung dili nimo ma-kompleto ang proceso. Ang mga pagsulay wa nagpasabot nga mahimo kang magmaluyahon kundili gitugot kini sa Dios aron ikaw mahimong duol Kaniya. Ang Dios mopadayag sa iyang kaugalingon aron sa pagsangkap ug paggiya nimo sa maayong buhaton aron matugkad sa imong damgo ug maangkon ang kadaugan.
Atong tan-awon si Abraham taliwala sa proceso, gisulayan siya pinaagi sa kagutom, kapakyasan, way-pagsinabtanay, pagpakiggubat ug lakip na ang pagsulay sa kauswagan. Nakigbisug, nagmalahutayon ug nakapasar si Abraham sa maong pagsulay. Ang Dios nagpadayag kaniya ug gipanalanginan siya.
Ang Dios nagtanom ug espisipiko nga binhi sa damgo sa matag-usa. Aron nimo maangkon ang milagro nga imong gikinahanglan, itanom ang Pulong sa Dios sama sa usa ka binhi sa imong kasingkasing. Ang tinuod nga pagpadayag sa Pulong sa Diyos mao ang labing importante nga elemento sa usa ka madaugon, mauswagon ug madagayaon nga kinabuhi.
Ang Gahum sa Atong Pulong
Sinulat ni Stella Tabelon
Proverbio 18:21
Kamatayon ug kinabuhi maoy anaa sa gahum sa dila; Ug kadtong mahagugma niini magakaon sa bunga niana.
Ang Proverbio nagsulti kanato nga ang atong mga pulong gamhanan, Unsa ang atong isulti ug giunsa nato pagsulti adunay malungtaron nga resulta nga maka-apekto sa tawo. Nag-agad kini kung unsa ang mga pulong nga moguwa sa atong baba. Ang atong pulong nga isulti makahatag ug kinabuhi, paglaum, ug gugma o puede pod nga maoy modala sa kamatayon, division, kapildihan ug kalaglagan sama sa tsismis, pagdaot sa isig ka tawo, pagpamakak, kakulang sa panag-uyon, pagpakaylap sa malisyoso o kontrobersyal nga istorya nga makaguba sa confiansa, etc.
Busa kinahanglan nga mogamit kita sa gahum sa maalamon nga paagi. Maningkamot kita nga mahimong dali nga makadungog pero magmahinay sa pagsulti ug magmahinay sa kasuko. Ang Efeso 4:29 nagtudlo kanato nga kinahanglan walay sulting mahilas nga magagula gikan sa atong baba, kondili kanang mga maayo lamang nga makapalig-on ug angay sa higayon, aron makahatag kinig kaayohan ngadto sa mga magapatalinghug. Atong pillion ang pagsulti sa mga pulong sa kinabuhi.